Friday, September 21, 2007

သားသားအတွက်

သားသားရေ...
သားသားကို ဖေဖေ့ရဲ့ မျှော်လင့်ချက်တွေအတွက် မကြိုးစားခိုင်းပါဘူး
သားသားရဲ့ မျှော်လင့်ချက်တွေကိုတော့ ဘယ်တော့မှ မဆုံးရှုံးစေနဲ့နော်

သားသားရေ...
သားသားရှိမှ ဖေဖေ့ဘ၀ အဓိပ္ပါယ်ရှိလာတယ်လို့ မပြောချင်ပေမယ့်
သားသားအတွက် ဖေဖေက အမြဲတမ်း အဓိပ္ပါယ်ရှိနေမှာပါ

သားသားရေ...
သားသားမှာ နောက်ထပ် ပေါင်းသင်းခင်မင်စရာ၊ ချစ်စရာ လူတွေ အများကြီးတွေ့ရဦးမှာပါ
ဖေဖေကတော့ သားသားနဲ့တင် ချစ်ရမယ့်လူတွေ ထပ်မရှိနိုင်တော့ပါဘူးကွာ

သားသားရေ...
သားသားအတွက် ဖေဖေက စည်းစိမ်ဥစ္စာတွေ အများကြီးမပေးနိုင်ရင်တောင်
စည်းစိမ်ဥစ္စာအတွက် မမိုက်မဲဖို့ သင်ခန်းစာတွေ လုံလုံလောက်လောက် ပြောပြမှာပါကွာ

သားသားရေ...
သားသားအတွက် ချုပ်နှောင်တဲ့ စည်းကမ်းတွေနဲ့ အမြင့်ကြီးကို တင်ပေးမယ့်အစား
လွတ်လပ်ပြီး သားသားခုံမင်တဲ့ ဘ၀မျိုးကိုပဲ ရောက်စေချင်တာပါကွာ

သားသားရေ...
ဘယ်သူက ဘာကွ၊ ဘယ်အရာက ဘယ်လိုကွ ဆိုတာမျိုး ပြောပြဖို့ထက်
သားသားရဲ့ လွတ်လပ်တဲ့ အတွေးအခေါ်တွေကို ၀ိုင်းပြီးဆွေးနွေးဖို့ ပိုပြီး စိတ်ဝင်စားတယ်ကွာ

သားသားရေ...
နိုင်ငံတကာ အဆင့်မှီ ဘွဲ့တွေ၊ ဒီဂရီတွေနဲ့ ပညာတတ်ကြီး မဖြစ်ချင်နေပါစေ
ဘယ်သူ့ကိုမှ ဒုက္ခမပေးမိအောင် နေတတ်တဲ့ ပညာရှိကြီး ဖြစ်ပါစေကွာ

သားသားရေ...
ဖေဖေစကားတွေ သားတစ်ချိန်မှာ ဖတ်ပြီးရင်
တို့နှစ်ယောက် ထပ်ပြီး အသေးစိတ် ဆွေးနွေးကြဦးမယ်ကွာ။ ။

နောင်ကိုလည်း ဖေဖေ စိတ်ကူးရသလို ရေးသွားဦးမယ်နော်။